Umabot na sa kabuuang 28,247 barangay sa buong bansa ang idineklara nang “drug free” ng Philippine Drug Enforcement Agency.
Ito’y batay sa datos ng PDEA mula Hulyo 1, 2022 hanggang ngayong Enero 31, 2024.
Sa ngayon, nasa 7,264 na barangay na lang ang apektado ng iligal na droga.
Sa isinagawang National Anti-Drug Campaign ng PDEA sa nabanggit na panahon, pumalo sa P31.98 bilyon ang kabuuang halaga ng iligal na droga ang nakumpiska.
Pinakamaraming nakumpiska ang shabu na umabot sa 4,317.46 kg, marijuana 3,197.19 kg, ecstacy 54,013 piraso, at cocaine 50.47 kg.
Ayon pa sa ulat, may isang clandestine laboratory ang nasira ng PDEA operatives at 856 na drug dens.
Pumalo na sa 79,841 na drug personalities ang naaresto sa 58,496 na anti-drug operations na isinagawa nito. Sa kabuuang bilang 5,366 dito ay high value targets. | ulat ni Rey Ferrer