Nasa P24 na milyong halaga ng proyektong pang-imprastraktura ang ibinigay ng Department of the Interior and Local Government (DILG) Region 2 sa local government unit (LGU) ng Nagtipunan, sa Lalawigan ng Quirino.
Sa ilalim ng Support to the Barangay Development Program (SBDP) ng DILG na napondohan sa ilalim ng 2022 Local Government Support Fund, walong proyekto ang ganap nang pag-aari ng iba’t ibang barangay sa naturang bayan na dating apektado ng insurhensiya.
Pinangunahan ni Regional Director Agnes Ancheta De Leon ang pagbubukas at pagpapasakamay sa farm-to-market road sa mga barangay ng Anak, Dissimungal, at Landingan; at ang pagkokongkreto sa farm-to-market road sa Purok 1 at Purok 2 ng Barangay Sangbay.
Kasama pa rito ang proyektong pagbubukas at pagsesemento ng kalsada sa Sitio Penippagan at Sitio Tapgak ng Barangay Wasid; at ang konstruksyon ng potable water system sa Barangay San Ramos.
Ang SBDP ay isa sa mga mekanismo ng Executive Order No. 70, na naglalayong makamit ang inklusibo at nagpapatuloy na pag-unlad. Isa ito sa mga prayoridad na programa ng pamahalaan para makatulong sa pagbababa ng basic services sa mga liblib na barangay, at nang mapaunlad at mapaangat ang pamumuhay ng mga residente sa mga lugar na ito. | ulat ni April Racho, RP Tuguegarao
📸 86th Infantry Battalion, Philippine Army
