Maayos na naisagawa ang huling Rotation and Resupply (RoRe) Mission ng Armed Forces of the Philippines (AFP) sa BRP Sierra Madre sa Ayungin Shoal.
Ito ang inanunsyo ni AFP Spokesperson Col. Francel Margareth Padilla ngayong umaga.
Bagama’t hindi nagbigay ng detalye sa huling RoRe mission, sinabi ni Padilla na naging “flawless” o walang aberya, ang paghahatid ng supply boat sa mga tropa at kagamitan sa BRP Sierra Madre, kasabay ng pagdeklara ng “mission accomplished”.
Matatandaang sa mga nakalipas na RoRe mission sa BRP Sierra Madre, ginamitan ng water cannon at tinangkang harangan ng Chinese Coast guard ang mga kinontratang supply boat ng AFP.
Nitong Sabado inihayag ng Chinese Coast Guard na nagkaroon umano ng “temporary arrangement” para pahintulutan nila ang paghahatid ng supply sa BRP Sierra Madre.
Mariin namang itong itinanggi ng AFP at National Security Council (NSC), kasabay ng pagbibigay diin na hindi kailangan ng Pilipinas magpaalam kaninoman para magsagawa ng mga operasyon sa loob ng Exclusive Economic Zone ng bansa. | ulat ni Leo Sarne