Nagtungo si PNP Chief Police General Benjamin Acorda Jr. sa Calbayog City ngayong araw para personal na makiramay sa pamilya ng mga pulis na nasawi sa operasyon laban sa notoryus na Ampoan Criminal Group.
Kasabay nito binisita din ni Gen. Acorda ang mga pulis na sugatan sa naturang operasyon, na nagpapagaling sa ospital.
Sa pakikipagusap sa mga mamahayag, sinabi ng PNP Chief na labis niyang ikinalulungkot ang sinapit ng kanyang mga tauhan, pero ang pagsusugal ng buhay ay bahagi ng propesyon ng isang pulis.
Sinabi ni PNP Chief na ikinararangal niya ang ipinamalas na katapangan at determinasyon ng mga pulis na bahagi ng operasyon sa pagganap ng kanilang tungkulin.
Sa nabanggit na operasyon na isinagawa sa Brgy. Mahayag, Sta. Margarita, Samar kamakalawa, 3 miymebro ng Samar Provincial Mobile Force Batallion ang nagbuwis ng buhay makaraang mauwi sa madugong sagupaan ang pagsisilbi lamang sana ng warrant of arrest laban sa mga suspek na sina Edito Ampoan, Jojo Altarejos at Rogelio Macurol. | ulat ni Leo Sarne