Patuloy ang pag-arangkada ng ika-31 taon ng Philippine Travel Agencies Association Travel Tour Expo (PTAA-PTE) ngayong araw na kasalukuyang ginaganap sa SMX Convention Center sa Mall of Asia Complex sa Pasay City.
Tampok sa PTAA Travel Expo ang samu’t saring mga travel sale at discounts sa iba’t ibang destinasyon sa kapwa loob at labas ng bansa.
Patok sa mga pumupunta sa Expo ang mga local destinations tulad ng Boracay, Siargao, Cebu, Palawan, at maraming pang iba.
Gayundin ang mga airfare seat sale tulad na lamang ng isang airline na may alok na sa halagang P388 lamang ay makakapunta ka na sa mga destinasyon tulad ng Iloilo at Cagayan de Oro.
May mga booths din na may alok na mga full travel packages, visa services, hotel o resort accommodation, cruise liners and shipping, at iba pa.
Tinatayang ngayong taon may 200 participating exhibitors ang lumahok sa TTE 2024 at binubuo ng higit sa 700 booths.
Kabilang na dito ang mga food and snack stalls na naghihintay para sa mga magugutom dahil sa pag-iikot sa Expo.
Inaasahan naman ng mga organizers na aabot sa hindi bababa sa 100,000 katao ang makikilahok sa expo ngayong taon.
Tatakbo ang TTE 2024 hanggang ika-apat ng Pebrero dito sa SMX Convention Center sa Pasay City. | ulat ni EJ Lazaro
