Hindi gagamit ng pwersa ang Armed Forces of the Philippines (AFP) sa mga Rotation and Resupply (RoRe) Mission sa Ayungin Shoal.
Ito ang binigyang diin ni Philippine Navy Spokesperson for the West Philippine Sea Commodore Roy Vincent Trinidad sa isang ambush interview sa Camp Aguinaldo.
Ito’y sa kabila ng huling insidente kung saan binomba ng Chinese Coast Guard ng water cannon ang resupply boat ng Pilipinas, na nagresulta sa pagkawasak ng windshield nito at pagkasugat ng apat na pasahero.
Paliwanag ni Commo. Trinidad, sumusunod ang AFP sa “rules of engagement” na nagtatakda kung kailan dapat gumamit ng pwersa, na isang mekanismo para masiguro na hindi mag-escalate ang sitwasyon.
Hindi aniya pinapahintulutan ng rules of engagement ang paggamit ng pwersa sa RoRe mission dahil hindi ito kailangan para magampanan ang misyon, maliban kung ito ay para ipagtanggol ang sarili, unit, o iba pa. | ulat ni Leo Sarne
