Inaresto sa bisa ng warrant of arrest ng mga tauhan ng Criminal Investigation and Detection Group (CIDG) ang top 3 most wanted sa Bangsamoro Autonomous Region (BAR) na si alyas “Orlan Lindungan Ayunan” sa Brgy. Bagua 1, Cotabato City nitong Miyerkules.
Ayon kay CIDG Director Police Major General Romeo Caramat Jr., ang akusado ay wanted sa kasong murder at frustrated murder sa pagpatay kay PNP retired PCol. Rolen D. Balquin at pagkasugat sa kanyang police security escort sa Cotabato City noong Marso 19, 2022.
Narekober sa akusado ang isang US Army Cal. 45 pistol, isang magasin at 8 cal. 45 bala.
Ang akusado at ang narekober na ebidensya ay dinala sa CIDG Cotabato City Field Unit (CFU) para sa dokumentasyon bago iharap sa korte na nag-isyu ng warrant.
Tiniyak naman ni MGen. Caramat na walang pagod na tutugisin ng CIDG ang mga wanted na kriminal bilang pagsuporta sa pinaigting na anti-criminality campaign ni PNP Chief Police General Benjamin Acorda Jr. | ulat ni Leo Sarne
📷: CIDG
