Sisimulan na ng Metropolitan Manila Development Authority (MMDA) ngayong araw ang paninita sa mga electric o e-bike at e-trike na daraan sa mga pangunahing lansangan sa Metro Manila.
Ito ang inihayag ni MMDA Acting Chairperson, Atty. Don Artes sa ipinatawag na pulong-balitaan sa tanggapan nito sa Pasig City.
Gayunman, nilinaw ni Artes na tanging paninita ang kanilang gagawin sa ngayon at hindi muna sila manghuhuli o magbibigay ng ticket sa mga mahuhuling lalabag.
Paliwanag niya, ito’y bilang konsiderasyon na rin sa dalawang araw na transport strike na ikinasa ng mga grupong MANIBELA at PISTON.
Subalit pagsapit ng Miyerkules, Abril 17 ay doon na huhulihin at bibigyan ng ticket ang mga lalabag.
Maliban sa e-trike at e-bike, bawal na ring dumaan sa mga pangunahing lansangan ang mga tricycle, pedicab, kuliglig at kariton. | ulat ni Jaymark Dagala