Inanunsyo ni PNP Public Information Office Chief Police Col. Jean Fajardo ang pagkakaaresto kaninang umaga ng pangunahing suspek sa pagpatay sa brodkaster na si Juan Jumalon na kilala bilang DJ “Johnny Walker”.
Sa pulong balitaan sa Camp Crame, kinilala ni Fajardo ang suspek na si Julito Mangumpit alyas Ricky na nasakote sa pinagsanib na operasyon ng Misamis Occidental at Zamboanga Del Norte PNP.
Una nang naaresto noong Marso ng taong kasalukuyan ang dalawa sa tatlong suspek sa pagpatay sa brodkaster.
Matatandaang binaril at pinatay ng isang gunman ang biktima sa loob ng kanyang bahay sa gitna ng kanyang live program noong Nobyembre 5, 2023 habang nakabantay sa labas ng kanyang bahay ang dalawa pang suspek.
Ayon kay Fajardo, sa pagkakahuli kay Mangumpit ay “accounted for” na ang lahat ng suspek sa brutal na krimen, para mapanagot sa batas. | ulat ni Leo Sarne
