Dahil sa inaasahang 42 degrees Celsius na Heat Index o init ng panahon bukas, Abril 5, pansamantalang ititigil ang face-to-face classes sa lahat ng pampubliko at pribadong paaralan.
Ito ay alinsunod sa Executive Order No. 42 na inilabas ni Mayor Imelda “Emi” Calixto-Rubiano na kung papalo sa 42 degree Celsius o higit pa ang temperatura ay pansamantalang isususpinde ang mga face-to-face classes sa lungsod.
Ayon sa 2-day Climate Heat Index forecast ng PAGASA-DOST noong Miyerkules, April 3, papalo sa 42 degrees Celsius ang mararanasang tindi ng init sa NAIA, Pasay ngayong Biyernes, Abril 5, 2024.
Ang paraan ng pagtuturo at pagkatuto ay isasagawa sa pamamagitan ng online, modular o anumang alternatibo at batay sa kakayahan ng mga paaralan, guro at mag-aaral. | ulat ni AJ Ignacio