Ipinaabot ng Department of Education (DepEd) ang kanilang taos-pusong pakikiramay sa naulilang pamilya ng dalawang estudyante mula sa Iloilo at South Cotabato na napaulat na nasawi
Batay sa ulat ng DepEd, nasawi ang Grade 10 student mula sa Maasin, Iloilo noon pang May 10 subalit hindi nito idinetalye ang sanhi ng kamatayan ng nasabing bata.
Nagkakasa na ng psychosocial intervention ang Child Protection Committee ng nakasasakop na paaralan sa mga malalapit na guro at kaibigan ng naturang learner.
Nakikipag-ugnayan na rin ang pamunuan ng paaralan sa mga kinauukulan hinggil sa usapin.
Dahil dito, umapila ang DepEd sa publiko na iwasan ang pagpapakalat ng mga maling impormasyon o ispekulasyon hinggil sa sanhi ng kamatayan ng naturang mag-aaral.
Samantala, nasawi naman ang 10-taong gulang na batang babae sa Tupi, South Cotabato na hinihinalang ginahasa muna bago patayin ng isang 44-anyos na suspek.
Agad namang nahuli ang suspek subalit namatay din matapos mabaril ng Pulis dahil sa pang-aagaw ng baril habang isinasailalim sa inquest proceedings.
Dahil dito, iginiit ng kagawaran na walang puwang ang anumang karahasan sa mga kabataan at nanawagan sa mga awtoridad na paigtingin ang kanilang hakbang para tiyaking ligtas ang mga komunidad. | ulat ni Jaymark Dagala
