Pinabulaanan ni Philippine National Police (PNP) Public Information Office Chief Police Colonel Jean Fajardo ang alegasyong tiniktikan ng PNP ang inuupahang bahay ni Vice President Sara Duterte, at pagkuha ng larawan ng kaniyang mga anak habang palabas ng bansa.
Ito ang inihayag ni Col. Fajardo sa Pulong balitaan sa Camp Crame kaugnay ng open letter ng Bise Presidente kay PNP Chief Police General Rommel Francisco Marbil, tungkol sa umano’y “political harassment” na ginawa sa kanya ng PNP.
Samantala, walang pahayag ang PNP Chief tungkol sa naturang alegasyon at sinabi ni Col. Fajardo na mas naka-focus si Gen. Marbil sa humanitarian mission sa mga nabiktima ng nagdaang bagyo, kung saan kabilang din sa mga apektado ang mga pulis.
Nagtungo din aniya ang PNP Chief sa Calabarzon para personal na kumustahin at parangalan ang dalawang pulis na sugatan sa pagganap ng kanilang tungkulin. | ulat ni Leo Sarne
