Magkakaloob ng libreng sakay ang Pamahalaang Lungsod ng Pasig sa mga maaapektuhang pasahero sa ikinasang tigil-pasada ng grupong MANIBELA, bukas.
Ayon sa Pasig LGU, bahagi ito ng kanilang contingency plan para alalayan ang mga pasahero na mahihirapang sumakay.
Gayunman, hindi pa tinukoy kung ilang bus ang kanilang gagamitin dahil nakadepende ito sa magiging sitwasyon bukas.
Kahapon, ilang pasahero na ang naapektuhan makaraang biglang tumigil sa pamamasada ang ilang miyembro ng MANIBELA partikular na ang rutang Pasig Palengke-Quiapo.
Subalit agad na nakaresponde ang local government para alalayan ang mga apektadong pasahero. | ulat ni Jaymark Dagala
