Nagdadag ng pwersa ang Philippine National Police (PNP) sa mga areas of convergence ngayong long weekend para sa inaasahang pagdagsa ng mga tao.
Ayon kay PNP Public Information Office Chief Col. Jean Fajardo, pinaalalahan ng Directorate for Operations ang lahat ng field commanders sa pagpapaigting ng seguridad partikular sa mga bus terminal, pantalan at mga pasyalan para alalayan ang mga pasahero.
Magpapakalat din ng K-9 teams ang PNP upang matiyak na walang kontrabandong makakalusot.
Kasabay nito, pinaalalahan ng PNP ang publiko na magsagawa ng kaukulang pag-iingat upang maiwasang mabiktima ng salisi gang kung iiwanang walang tao ang kanilang mga tirahan.
Nagpaalala rin ang PNP sa mga biyahero na mag-ingat sa mandurukot at snatcher at iwasang magdala ng mamamahaling gamit upang hindi mabiktima ng mga masasamang loob. | ulat ni Leo Sarne
