Mananagot sa batas ang mga magulang na kusang nag “alay” ng kanilang mga menor de edad na anak para pagsilbihan si Kingdom of Jesus Christ (KOJC) Founder Pastor Apollo Quiboloy.
Ito ang tiniyak ni Philippine National Police (PNP) Public Information Office Chief Police Colonel Jean Fajardo, kasabay ng pagsabi na nakakaalarma ang bilang ng mga batang ito na umano’y inabuso ni Quiboloy.
Ayon kay Fajardo, paniniwala ng mga magulang na “passes to heaven” ang pagsisilbi ng kanilang mga anak kay Quiboloy.
Sa ngayon, patuloy aniya na nangangalap ng impormasyon ang PNP at patuloy din ang pagdami ng mga complainant o mga biktima ng umano’y pangmomolestiya ni Quiboloy na lumalapit sa PNP para magsumbong.
Tiniyak naman ni Fajardo, na ligtas na ang mga biktima na pawang mga takot at traumatized, matapos na pagbantaan na hahabulin sila ng “Angels of Death” kapag nagkwento sila ng karanasan sa mga kamay ni Quiboloy. | ulat ni Leo Sarne
