Napilitan lang na sumuko si Pastor Apollo Quiboloy dahil nasukol na siya ng mga pulis.
Ito ang binigyang diin ni Department of the Interior and Local Government (DILG) Secretary Benjamin Abalos Jr. nang iprisinta sa mga mamamahayag sa Camp Crame si Quiboloy at mga kapwa-akusado, sa kasong qualified human trafficking at child and sexual abuse.
Binigyang diin ni Abalos, na tama ang intelihensya ng PNP na nasa loob lang Kingdom of Jesus Christ (KOJC) compound si Quiboloy sa loob ng mahigit dalawang linggong paghahanap sa kanya ng mga pulis.
Tama din aniya ang ginawa ng PNP na itinuloy ang operasyon sa kabila ng kaliwat-kanang demanda at pagpapahirap sa kanila ng mga miymebro ng KOJC.
Nagpasalamat naman si Abalos sa lahat ng pulis na bahagi ng operasyon sa KOJC compound sa pamumuno ni Police Regional Office 11 Regional Director Police BGen. Nicolas Torre III, na hindi nagpatinag sa kabila ng matinding pinagdaanan para maisilbi ang warrant kay Quiboloy. | ulat ni Leo Sarne
