Mahigit 47,000 na pulis na ang ipinakalat ng Philippine National Police (PNP) sa buong bansa bilang bahagi ng seguridad ngayong holiday season.
Ayon kay PNP Spokesperson Police Brigadier General Jean Fajardo, sinimulan ang deployment kaninang umaga kasabay ng unang araw ng Simbang Gabi o Misa de Gallo.
Magpapatuloy ang deployment hanggang January 6, 2025, na siyang pagtatapos ng programang Ligtas Paskuhan.
Nilinaw ni Fajardo, na walang na-monitor na ano mang banta sa seguridad ang PNP, at ang hakbang na ito ay bahagi ng masusing pagtitiyak ng kaligtasan ng publiko.
Layon din nitong mapigilan ang mga kriminal na magsasamantala ngayong abala ang mga tao sa holiday activities.
Dagdag pa ni Fajardo, patuloy na nakikipagtulungan ang PNP sa iba’t ibang ahensya ng pamahalaan upang higit pang palakasin ang seguridad sa mga komunidad. | ulat ni Diane Lear
