Patuloy pa ring pinag-iingat ng Bureau of Fisheries and Aquatic Resources (BFAR) ang publiko sa pagkain ng mga shellfish na makukuha sa limang baybayin na positibo pa rin sa red tide toxin.
Ayon sa BFAR, kabilang sa mga apektado nito ang Dumanquillas Bay sa Zamboanga del Sur; coastal waters ng Daram Island at Irong-Irong Bay sa Samar; Matarinao Bay sa Eastern Samar; at karagatan ng Tungawan sa Zamboanga Sibugay.
Dahil sa nadiskubreng Paralytic Shellfish Poison (PSP) ay hindi pa rin ligtas kainin ang mga shellfish na mahahango sa mga naturang katubigan.
Sa kabila nito, ligtas naman kumain ng mga isda, pusit, hipon at alimangong huli o nagmula sa nasabing karagatan basta mahugasan at maluluto itong mabuti.
Samantala, ligtas naman na sa red tide ang coastal waters ng Biliran Island sa Biliran Province. | ulat ni Merry Ann Bastasa
