Bumaba ng 15 porsyento ang budgetary support ng pamahalaan sa mga government-owned and controlled corporations (GOCCs) noong 2024, na umabot lamang sa ₱139 bilyon mula sa ₱163.5 bilyon noong 2023.
Ayon sa Bureau of the Treasury, ang pagbibigay ng subsidiya sa mga GOCC ay bahagi ng estratehiya ng pamahalaan upang matustusan ang kanilang operasyon, lalo na kung kulang ang kanilang kita.
Noong 2023, sinimulan na ng administrasyong Marcos ang pagbabawas sa mga subsidiya bilang bahagi ng fiscal consolidation upang mapababa ang budget deficit at kabuuang utang ng bansa.
Sa kabila ng kabuuang pagbaba ng subsidiya, tumaas naman ang suporta sa mga pangunahing non-financial GOCCs na umabot sa ₱95.41 bilyon ngayong taon—28 porsyento na mas mataas kumpara sa ₱74.7 bilyon noong nakaraang taon. Ito ay katumbas ng 69 porsyento ng kabuuang subsidiya.
Samantala, halos 27 porsyento ng subsidiya o humigit-kumulang ₱38 bilyon ang inilaan sa iba pang korporasyong pag-aari ng gobyerno—malayo sa ₱88.2 bilyon noong 2023, na may 57 porsyentong pagbaba.
Ang natitirang ₱5.58 bilyon ay napunta sa mga institusyong pampinansyal ng gobyerno, na may halos siyam na ulit na pagtaas kumpara sa nakaraang taon.
Sa talaan ng mga ahensya, nanguna ang National Irrigation Administration (NIA) sa nakatanggap ng pinakamaraming subsidiya noong 2024 na umabot sa ₱71.21 bilyon.
Pangalawa ang National Food Authority (NFA) na nakatanggap ng ₱11.25 bilyon (10.4 porsyento), samantala, pumangatlo ang Philippine Health Insurance Corp. (PhilHealth) na may ₱9.6 bilyong subsidiya—bumaba ng 81 porsyento mula sa ₱50.75 bilyon noong 2023. | ulat ni Melany V. Reyes
