Photo courtesy of Department of Energy
15 local government units (LGUs) sa National Capital Region (NCR) ang nakikilahok na ngayon sa solar program ng Department of Energy (DOE) na naglalayong mapababa ang gastusin sa kuryente at mapalawak ang paggamit ng malinis na enerhiya sa mga pampublikong pasilidad.
Pormal na lumagda sa Memorandum of Agreement (MOA) ang mga lungsod ng Caloocan, Las Piñas, Malabon, Muntinlupa, at Parañaque, gayundin ang Bayan ng Pateros, bilang ikalawang batch ng mga LGU na sasali sa programang ‘Solar Solutions for Government: Energy Efficiency and Renewable Energy in Public Buildings (SSG-ERPB)’.
Nakikiisa sila sa mga lungsod ng Mandaluyong, Manila, Navotas, Pasay, Pasig, Quezon City, San Juan, Taguig, at Valenzuela na unang lumagda sa kasunduan noong Nobyembre 2025.
Sa ilalim ng programa, magsasagawa ang mga kalahok na LGU ng iba’t ibang hakbang para sa pagtitipid ng enerhiya at paggamit ng renewable energy sa mga gusali ng pamahalaan. Kabilang dito ang energy-efficient retrofits, paglalagay ng rooftop solar photovoltaic (PV) systems, at iba pang proyekto na alinsunod sa Energy Efficiency and Conservation Act o Republic Act No. 11285.
Ayon kay Energy Secretary Sharon Garin, ang matitipid sa konsumo ng kuryente ay maaaring ilaan sa iba pang mahahalagang serbisyo para sa mamamayan.
Aniya, bawat pisong matitipid sa pamamagitan ng energy efficiency at solar power ay maaaring magamit para sa pagpapabuti ng serbisyong pangkalusugan, edukasyon, at iba pang programang panlipunan.
Binigyang-diin din ni Garin na mahalaga ang pagpapabilis ng paggamit ng solar energy sa gitna ng tumataas na demand sa kuryente at mga hamong dulot ng pagbabago ng klima.
Upang higit na mapadali ang pagpapatupad ng mga solar project, nakipagtulungan ang DOE sa Department of the Interior and Local Government (DILG) at Department of Public Works and Highways (DPWH) sa paglalabas ng Joint Memorandum Circular na naglalayong pabilisin ang proseso ng net-metering applications sa buong bansa.
Sa pamamagitan ng SSG-ERPB initiative, nagbibigay ang DOE ng teknikal na tulong sa mga LGU sa pagtukoy, pagsusuri, at pagpapatupad ng mga proyektong may kaugnayan sa solar energy at energy efficiency.
Ayon sa DOE, magsisilbing modelo ang lumalawak na partisipasyon ng mga LGU sa NCR para sa iba pang mga lungsod at munisipalidad sa bansa sa pagsusulong ng mahusay na pamamahala, pagtitipid sa gastusin, at paggamit ng malinis at napapanatiling enerhiya. | Department of Energy
About the Author
