📷 LTJG F Berbigal PCG
Bagamat nasa libo-libong milya ang layo mula sa sariling bayan, nakiisa ang kontingente ng Philippine Coast Guard (PCG) sa buong bansa sa paggunita ng ika-10 anibersaryo ng makasaysayang 2016 South China Sea Arbitral Award noong Hulyo 6, 2026.
Isinagawa ng mga tauhan ng PCG ang isang sabayang flag-raising ceremony sa ibabaw ng barkong BRP Gabriela Silang (OPV-8301), na kasalukuyang nasa Hawaii para lumahok sa prestihiyosong Rim of the Pacific (RIMPAC) 2026 Exercise.
Ayon sa PCG, ang pagdiriwang na ito ay muling nagpapatibay sa panata ng Pilipinas na itaguyod ang batas internasyonal, isulong ang kapayapaan at katatagan, at pangalagaan ang soberanya at hurisdiksyon ng bansa sa West Philippine Sea (WPS).
Binigyang-diin din ng ahensya na ang aktibidad na ito ay patunay ng walang-humpay na suporta ng PCG sa isang rules-based international order. Nangako ang pamunuan na ipagpapatuloy ang pagprotekta sa interes ng bansa sa karagatan sa pamamagitan ng mga legal, mapayapa, at propesyonal na operasyon.
“Sa pamamagitan ng pakikibahaging ito, muling binibigyang-buhay ng PCG ang dedikasyon nitong magsilbi sa mamamayang Pilipino nang may dangal at integridad, habang tumutulong sa pagpapanatili ng kapayapaan at kaunlaran sa West Philippine Sea at sa mas malawak na karagatan,” pahayag ng PCG.
About the Author
