Ipinamahagi ng Pamahalaang Panlalawigan ng Ilocos Sur ang ikalawang batch ng tulong na bigas sa 1,053 na maralitang residente sa bayan ng San Vicente noong Hulyo 29, 2026, sa pamamagitan ng Local Government Support Fund (LGSF).
Ayon kay Provincial Social Welfare and Development (PSWD) Officer Kathleen Balbuena, layunin ng programa sa ilalim ng administrasyon ni Pangulong Ferdinand R. Marcos Jr. na tulungan ang mga kapus-palad na pamilya kasabay ng pagsuporta sa mga lokal na magsasaka sa pamamagitan ng direktang pagbili ng bigas mula sa kanila.
Target ng naturang inisyatibo na mabigyan ang 50,000 pamilya sa buong lalawigan ng kabuuang 30 kilo ng bigas na hinahati sa tatlong installment. Naisagawa ang unang pamamahagi noong Mayo hanggang Hunyo, habang nakatakda naman ang huling bahagi sa ikatlong linggo ng Setyembre. Nakaagapay ang Department of the Interior and Local Government (DILG) upang matiyak ang mabilis at transparent na proseso.
Nagpaabot naman ng pasasalamat ang mga benepisyaryong tulad nina Elsa Reyes, 63, at Roberto Rimay, 59, na nagpahayag na malaking pampagaan sa gastusin ang natanggap na tulong sa gitna ng mataas na presyo ng mga pangunahing bilihin at pataba sa pagsasaka.
Tiniyak ng pamahalaang panlalawigan ang patuloy na pagpapaabot ng serbisyo at tulong sa mga residente ng Ilocos Sur, partikular sa mga nasa pinakamahirap na sektor.
📷 PIA Ilocos Sur
About the Author
