Karagdagang pondo para sa SUCs, inilabas ng DBM

Lorenz Tanjoco August 17, 2026 1 minute read

Naglabas ang Department of Budget and Management (DBM) ng ₱9.753 billion sa Commission on Higher Education (CHED) para tugunan ang kakulangan sa pondo ng Free Higher Education Program sa 108 State Universities and Colleges (SUCs) sa buong bansa.

Sasaklawin ng pondo ang mga obligasyon para sa Academic Years 2022–2023, 2023–2024, at 2024–2025.

Ayon kay DBM Acting Secretary Kim Robert De Leon, makatutulong ang release upang mabawasan ang pinansyal na pasanin ng mga SUC at magkaroon ang mga ito ng mas malaking pondong magagamit para sa academic programs, student services at pagpapahusay ng mga pasilidad.

Ang CHED, sa pamamagitan ng Unified Student Financial Assistance System for Tertiary Education (UniFAST), ang mangangasiwa sa pagpapalabas ng pondo sa mga benepisyaryong SUCs.

Ang halaga ay kukunin mula sa appropriations sa ilalim ng 2026 General Appropriations Act at Special Account in the General Fund–Higher Education Development Fund.

Sa ilalim ng Republic Act No. 10931 o Universal Access to Quality Tertiary Education Act, libre ang tuition at iba pang school fees sa mga SUCs at CHED-recognized local universities and colleges.