Ibinida ni Pangulong Ferdinand R. Marcos Jr. noong Miyerkules ang naging epekto ng mga proyekto ng administrasyon sa flood-control, kasabay ng pagsusulong ng pagtatayo ng mga underground water storage bilang pangmatagalang solusyon laban sa pagbaha.
Sa isang situation briefing sa Metropolitan Manila Development Authority (MMDA) Command Center sa Pasig City, ipinunto ng Pangulo na mas mabilis na ngayong humupa ang baha sa Kalakhang Maynila sa kabila ng matinding buhos ng ulan na dala ng habagat.
“Kung dati mag-aantay ang tao ng 2-3 araw bago mawala yung baha, ngayon wala pang isang araw, wala na,” pahayag ni PBBM. Dagdag niya, ang ilang lugar na dati ay inaabot ng baha hanggang ikalawang palapag ay nakararanas na lamang ngayon ng mababaw na tubig o tuluyan nang hindi binabaha.
Mga Pangunahing Datos Mula sa Briefing
- Dami ng Ulan: Bumuhos ang nasa 201 millimeters na ulan sa loob lamang ng limang oras—katumbas ng halos 50,000 Olympic-sized swimming pools o 44% ng ulang naitala noong Bagyong Ondoy sa loob ng 24 oras.
- Aksyon sa Imprastraktura: Gumagana ang lahat ng 73 pumping stations, at nagpakalat pa ng 11 mobile pumping units. Pinapalitan na rin ang mga luma at maliliit na tubo ng imburnal na nakakabit pa mula noong World War II upang mapabilis ang pagdaloy ng tubig.
- Epekto ng Habagat: Umabot sa 4,700 barangay at 1.7 milyong pamilya ang naapektuhan ng nagdaang kalamidad. May naitalang 27 nasawi at 17 sugatan.
Pangmatagalang Solusyon: Underground Water Storage Upang maibsan ang pwersa sa mga drainage system ng siyudad at hindi dumiretso lamang sa dagat ang labis na tubig-ulan, isinusulong ni Pangulong Marcos ang pagtatayo ng mga malalaking imbakan ng tubig sa ilalim ng lupa (cisterns).
Tukoy na ng pamahalaan ang 30 potensyal na lokasyon para sa proyektong ito, kabilang ang:
- Raja Sulaiman
- Rizal Memorial Sports Complex
- Camp Aguinaldo
- University of Santo Tomas (UST) campus
Ayon sa Pangulo, huhukayin ang ilalim ng mga bukas na pasilidad tulad ng football fields, at ibabalik sa ayos ang ibabaw matapos mailagay ang imbakan. Nakikipag-ugnayan na ang gobyerno sa mga nangangasiwa sa mga nabanggit na lugar, at inaasahang matatapos ang detailed engineering studies ngayong buwan.
Bukod sa pagpigil sa baha, ipinag-utos din ni PBBM na pag-aralan kung paano mapapakinabangan ang naipong tubig para sa mga kabahayan, industriya, o irigasyon matapos itong dumaan sa tamang treatment.
Kasama ng Pangulo sa nasabing briefing sina Executive Secretary Ralph Recto, DPWH Sec. Vince Dizon, DILG Sec. Jonvic Remulla, at MMDA Chairman Don Artes. Aminado ang Pangulo na marami pang dapat gawin upang protektahan ang bansa, lalo na’t patuloy na pinalalala ng climate change ang matitinding pag-ulan.
About the Author
