Kapwa tiniyak ng Philippine National Police (PNP) at ng Armed Forces of the Philippines (AFP) ang kanilang kahandaan gayundin ang buong suporta sa Commission on Elections (COMELEC).
Ito’y para tiyakin ang isang ligtas, mapayapaa at kapani-paniwalang Parliamentary Elections para sa Bagsamoro Autonomous Region in Muslim Mindanao (BARMM) sa September 14.
Ayon kay PNP Spokesman, PCol. Allen Rae Co, nasa 98 percent nang handa ang PNP para sa halalan na ini-ulat ni DILG Secretary Jonvic Remulla sa isinagawang Final Command Conference ng COMELEC kahapon sa Camp Salipada Pendatun sa Maguindanao del Norte.
Pinangunahan ni PNP Chief Police Gen. Jose Melencio Nartatez Jr. ang delegasyon ng PNP kasama sina AFP Chief of Staff, Gen. Antonio Nafarrete, OPAPRU Secretary Mel Senen Sarmiento at COMELEC Chairman George Erwin Garcia.
Kabilang sa mga tinalakay ang threat assessment, deployment readiness, security preparations at koordinasyon ng mga ahensya para matiyak ang maayos at mapayapang halalan.
Batay sa datos ng PNP, nasa 9,435 personnel ang nakatalagang magbigay ng seguridad sa BARMM elections.
Kabilang dito ang 4,361 personnel mula sa PRO BAR at 5,074 augmentation forces mula sa iba pang Police Regional Offices, Mobile Group, Highway Patrol Group, Explosive Ordnance Disposal at PNP Special Action Force.
Sakop ng deployment ang COMELEC offices, Treasurer’s Offices, voting centers, checkpoints, Quick Reaction Forces gayundin ang Civil Disturbance Management units at Special Electoral Boards.
About the Author
