Nagpatupad ng balasahan sa ilang matataas na opisyal ng Philippine National Police (PNP).
Batay sa General Orders na pirmado ni PNP Chief, Police Gen. Jose Melencio Nartatez Jr., epektibo ang balasahan ngayong araw.
Kabilang sa mga inilipat sina Police Regional Office 1 Director, Police Brig. Gen. Jovencio Badua Jr. na inilipat sa Directorate for Police Community Relations (DPCR) kapalit ni Police Maj. Gen. Roderick Augustus Alba na nagretiro na.
Papalit kay Badua sa PRO1 si Police Brig. Gen. Crisaleo Tolentino buhat sa Maritime Group na nakabase sa Kampo Crame.
Mula sa Directorate for Comptrollership (DC), inilipat si Police Brig. Gen. Jaime Cadatal sa Logistics Support Service (LSS) kapalit ni Police Brig. Gen. Noel Vallo na itinalaga naman sa Police Regional Office – Cordillera.
Papaltan ni Vallo sa PRO Cordillera si Police Brig. Gen. Ericson Dilag na inilipat sa Directorate for Information and Communication Technology Management (DICTM).
Buhat naman sa Police Regional Office CARAGA, inilipat si Police Brig. Gen. Marcial Magistrado IV sa Directorate for Comptrollership kapalit ni Cadatal.
Papalit naman kay Magistrado si Police Brig. Gen. Rolindo Suguilon na nagmula naman sa PNP Training Service.
Mula naman sa PNP Drug Enforcement Group (PDEG), inilpat sa Police Regional Office 9 si Police Brig. Gen. Elmer Ragay kapalit ni Police Brig. Gen. Dennis Esguerra na inilipat naman sa Directorate for Investigation and Detective Management (DIDM).
Paglilinaw ng PNP, ang panibagong balasahan sa hanay ng matataas nilang opisyal ay bunsod ng pagreretiro ng ilan sa kanilang mga kabaro.
About the Author
