Isusulong ng Department of Information and Communications Technology (DICT) ang mas masidhing pananagutan mula sa mga malalaking kumpanya ng teknolohiya o “Big Tech” sa antas ng Association of Southeast Asian Nations (ASEAN).
Ayon kay DICT Secretary Henry Aguda, layunin ng Pilipinas na magkaroon ng mas malinaw na mekanismo sa rehiyon para sa mabilis na pagtugon at mas malakas na proteksyon ng mga mamamayan laban sa mga banta sa internet. Isusunod ito sa mga kamakailang pakikipag-usap ng pamahalaan sa mga kinatawan ng Meta at Roblox sa Singapore.
“Hindi kayang harapin ng Pilipinas nang nag-iisa ang mga hamong ito, at maging ng alinmang kasaping bansa ng ASEAN. Ang ating naabot sa Singapore ay nagpapakita na ang pakikipag-ugnayan ay nagbubunga, ngunit mas marami tayong makakamtan kung ang ASEAN ay sama-samang kikilos,” pahayag ni Aguda.
Ang hakbang na ito ay kasunod ng panawagan ng Scam Watch Pilipinas para sa isang pangkalahatang pamamaraan ng ASEAN upang magkaroon ng mas malakas na puwersa ang mga kasaping bansa sa pagharap sa mga pandaigdigang platform kaugnay ng mga nakakapinsalang nilalaman, online scams, pekeng patalastas, maling impormasyon, at iba pang banta sa internet.
Inihayag din ni Scam Watch Pilipinas co-founder Jocel De Guzman na nararapat lamang na pamunuan ng Pilipinas ang talakayan ukol sa ASEAN digital sovereignty.
Plano ni Aguda na iharap ang usaping ito sa Ministerial Roundtable Meeting na may temang “AI: A Boon or Bane for Information and Media Cooperation” sa Oktubre 9 hanggang 10 sa Metro Manila, pati na rin sa ASEAN Senior Officials’ Meeting sa Oktubre 15 hanggang 17.
Binigyang-diin ng kalihim na ang halos 700 milyong mamamayan ng ASEAN ay malaking lakas na magagamit upang bumuo ng mas matibay na pakikipagkasundo sa mga dambuhalang kumpanya ng teknolohiya.
Sa mga naunang pakikipagpulong sa Singapore:
- Meta: Nangakong maghihigpit sa pakikipag-ugnayan sa mga awtoridad ng Pilipinas laban sa cybercrime, maling impormasyon, deepfakes gamit ang artificial intelligence (AI), at mga materyal ng pananamantala sa mga bata (Child Sexual Abuse and Exploitation Material).
- Roblox: Sumang-ayon na palakasin ang mga proteksyon para sa mga batang gumagamit nito, kabilang ang pakikipagtulungan sa age verification at parental controls.
“Kung gustong makapasok ng Big Tech sa merkado ng ASEAN, dapat itong may katapat na pananagutan sa mga pamahalaan ng ASEAN at proteksyon para sa mga mamamayan nito,” pagtatapos ni Aguda.
About the Author
