Nagbabala ang Department of Agriculture – Bureau of Fisheries and Aquatic Resources (DA-BFAR) sa mga mangingisda at nag-aalaga ng isda (fish farmers) na maging maagap sa paghahanda sa gitna ng inaasahang paglakas ng El Niño sa antas na “Very Strong” ayon sa Philippine Atmospheric, Geophysical and Astronomical Services Administration (PAGASA).
Ayon sa advisory ng PAGASA at BFAR, ang El Niño ay magdudulot ng mas mainit na panahon, kakulangan sa ulan, at problema sa supply ng tubig sa iba’t ibang dako ng bansa. Gayunpaman, binigyang-diin ng mga awtoridad na maaari pa ring magkaroon ng malalakas na pag-ulan dahil sa epekto ng Habagat at mga bagyo.
Mga Panganib sa Pangisdaan
Dahil sa pagbabago ng antas at kalidad ng tubig dulot ng matinding init, naglabas ng listahan ang BFAR ng mga posibleng epekto nito sa katubigan at aquatic life:
- Fish Kill: Pagkamatay ng mga isda dulot ng pagbaba ng dissolved oxygen sa tubig.
- Stres at Sakit: Pagtaas ng posibilidad ng sakit at stress sa mga isda at seaweeds.
- Coral Bleaching: Pagkasira at pagputi ng mga korales dahil sa matagal na pagtaas ng temperatura ng dagat.
- Pagbabago sa Salinity: Pagbabago sa alat ng tubig at kakulangan sa suplay ng malinis na tubig.
- Algal Blooms / Red Tide: Pag-usbong ng mga mapaminsalang algal bloom tulad ng red tide.
Gabay at Paalala sa mga Aquaculture Operators
Upang maprotektahan ang produksyon at kabuhayan, inirerekomenda ng BFAR ang mga sumusunod na maagap na hakbang sa pag-aalaga ng isda:
- Regular na Pagbabantay ng Tubig: Suriin ang temperatura, dissolved oxygen level, at alat (salinity) ng tubig.
- Iwasan ang Siksikan: Sundin ang angkop na dami ng alaga sa palaisdaan o fish cage (stocking density).
- Wastong Pagpapakain: Iangkop ang dami ng pakain sa aktwal na kinakain ng isda at iwasan ang labis na pagpapakain (overfeeding).
- Ihanda ang mga Kagamitan: Kumonsulta sa BFAR ukol sa paggamit ng aeration system at iba pang teknikal na pamamaraan upang mapanatiling sapat ang oxygen sa tubig.
Pinapayuhan din ng kawanihan ang pampublikong i-report agad sa pinakamalapit na BFAR office o local government unit (LGU) ang anumang hindi pangkaraniwang pagkamatay ng isda, hinala ng red tide, o pagbabago sa kalidad ng katubigan upang agad itong maaksyunan.
About the Author
