Nagbabala ang 10th Infantry (Agila) Division ng Philippine Army laban sa kumakalat na larawang gawa ng Artificial Intelligence o AI na maling nagpapakita sa mga tauhan nito bilang tagasuporta ni Senator Bato dela Rosa.
Ayon sa 10ID, hindi totoo ang naturang larawan at binago nito ang imahe ng mga sundalo sa pamamagitan ng pekeng pagpapakita ng kanilang suporta sa isang politiko.
Maaari rin itong magdulot ng maling impormasyon sa publiko at sumira sa propesyonalismo at pagiging neutral sa pulitika ng mga tauhan ng militar.
Dahil dito, nanawagan ang 10ID sa publiko na maging mapanuri sa mga larawang gawa ng AI at iba pang manipuladong content na kumakalat sa social media.
Pinayuhan din ang lahat na tiyakin muna ang katotohanan ng impormasyon mula sa mga opisyal na mapagkukunan bago magbahagi ng mga post na hindi pa beripikado.
Binigyang-diin ng 10ID na nananatili itong tapat sa propesyonalismo, pagiging neutral sa pulitika, at paglilingkod sa sambayanang Pilipino, nang walang kinikilingan o sinusuportahang partidong pampulitika.
Dagdag pa ng dibisyon, ang mga opisyal na posisyon at pahayag nito ay inilalabas lamang sa pamamagitan ng mga awtorisadong channel, at mariin nitong tinututulan ang pagpapakalat ng disinformation at maling paggamit ng AI upang baluktutin ang imahe ng mga tauhan nito.
📸 10th ID
About the Author
