Isang rice processing facility na nagkakahalaga ng ₱65.6 milyon ang ipinagkaloob ng Department of Agriculture (DA) sa isang kooperatiba sa Nueva Ecija bilang bahagi ng mga hakbang upang mabawasan ang postharvest losses at mapataas ang kita ng mga magsasaka.
Pormal na ipinagkaloob ang pasilidad sa Talabutab Norte Primary Multipurpose Cooperative sa General Mamerto Natividad sa pangunguna nina Agriculture Undersecretary for Rice Industry Development Engr. Christopher V. Morales at PHilMech Director IV Dr. Dionisio G. Alvindia, sa ilalim ng Rice Competitiveness Enhancement Fund (RCEF) Mechanization Program.
Kabilang sa mga pasilidad ang multi-stage rice mill na nagkakahalaga ng ₱54.7 milyon at may kapasidad na magproseso ng dalawa hanggang tatlong tonelada ng palay kada oras, gayundin ang tatlong mechanical dryer na may pinagsamang kapasidad na 24 tonelada kada batch.
Ayon kay Agriculture Secretary Francisco Tiu Laurel Jr., magbibigay ang pasilidad sa mga magsasaka ng higit na kontrol sa proseso ng pagpapatuyo at paggiling ng kanilang palay, na inaasahang makatutulong upang mapataas ang kalidad at halaga ng kanilang ani.
Samantala, magbibigay ang Philippine Center for Postharvest Development and Mechanization (PHilMech) ng kinakailangang pagsasanay at teknikal na suporta sa kooperatiba upang matiyak ang maayos at tuloy-tuloy na operasyon ng pasilidad.
About the Author
