Matagumpay na napigilan ng National Bureau of Investigation (NBI) ang isang planong mass shooting na isasagawa sana sa Lungsod ng Batac, Ilocos Norte, matapos makatanggap ng mahalagang impormasyon mula sa Federal Bureau of Investigation (FBI) ng Estados Unidos.
Ayon kay NBI Director Melvin Matibag, natuklasan ang nasabing plano sa pamamagitan ng pagsubaybay sa online conversations na ibinahagi ng FBI sa mga awtoridad sa Pilipinas.
Lumabas sa inisyal na ulat ng ahensya na tatlong menor de edad ang nakatakdang magsagawa ng nasabing pag-atake.
Agad namang kumilos ang mga operatiba ng NBI upang mapigilan ang insidente bago pa man ito maisakatuparan at makapaminsala sa publiko.
Ang mabilis na aksyon ay bahagi ng patuloy na pakikipag-ugnayan ng NBI sa international law enforcement agencies gaya ng FBI, upang matukoy at mapigilan ang mga banta sa seguridad na nabubuo sa internet at social media.
Patuloy ang isinasagawang imbestigasyon ng mga awtoridad hinggil sa motibo ng mga sangkot, kung paano sila nakakuha o nagplanong kumuha ng armas, at kung may iba pang indibidwal na nasa likod ng pag-uudyok sa mga menor de edad.
Nakatakda ring isailalim sa kaukulang proseso at interbensyon ang tatlong kabataan alinsunod sa batas na nangangalaga sa mga menor de edad.