Mabilis na tumugon ang United States Marine Corps (USMC) sa request for assistance ng Armed Forces of the Philippines (AFP) para maghatid ng relief supplies sa mga biktima ng bagyong Egay sa Batanes.
Ayon sa US Embassy, aktibong nagsasagawa ngayon ang USMC at AFP ng relief operations sa mga komunidad na apektado ng bagyo, kasunod ng matagumpay na pagtatapos ng joint Marine Aviation Support Activity sa pagitan ng dalawang pwersa.
Sa unang araw ng operasyon, tumulong ang USMC sa paghahatid ng 5,000 kilo ng tubig at pagkain mula sa gobyerno ng Pilipinas sa Basco, Batanes.
Ginamit ng Marine Medium Tiltrotor Squadron (VMM) 163 (Reinforced), Marine Aircraft Group 16, 3rd Marine Aircraft Wing ang MV-22B Osprey aircraft sa operasyon.
Ang presensya ng Marine Expeditionary Force assets sa rehiyon ay naging daan sa mabilis na pagresponde sa sitwasyon, na bahagi ng commitment ng Estados Unidos sa mga kaalyadong bansa. | ulat ni Leo Sarne
