Isinailalim na sa pre-charge investigation ng PNP Internal Affairs Service (IAS) ang mga pulis na sangkot maanomalyang drug operation sa Cavite kung saan pinagnakawan umano ang bahay ng suspek.
Ayon kay IAS Inspector General Alfegar Triambulo, 12 pulis ang isinama ng IAS sa Pre-Charge Investigation, kabilang ang dating Chief of Police ng Imus Cavite at Deputy Chief nito dahil posibleng kapabayaan.
Sinabi naman ni Triambulo na kumbinsido siya na dapat matanggal sa serbisyo ang mga pulis na direktang nagsagawa ng operasyon.
Ito’y dahil pinalabas umano ng mga ito na buy-bust ang operasyon nila pero ang ginagawa nila ay pagnanakaw.
Gumawa lang din umano sila ng scenario para bigyang katwiran ang pag-aresto nila sa inosenteng sibilyan.
Ipinunto ni Triambulo na alas-8 ng gabi nang gumawa ng scenario na buy-bust operation ang mga pulis pero nakuha sa CCTV na maliwanag pa nang magsagawa sila ng operasyon. | ulat ni Leo Sarne
