Ang Armed Forces of the Philippines ang frontliner sa pagtiyak ng mapayapang Barangay at Sangguniang Kabataan Elections.
Ito ang binigyang diin ni Presidential Adviser for Peace Reconciliation and Unity Secretary Carlito Galvez Jr. kasunod ng isinagawang AFP Peace Forum sa Camp Aguinaldo kahapon.
Ayon kay Sec. Galvez, ang mga Brigade Commander ang nakikipag-usap sa mga barangay official bago pa man isagawa ang halalan.
Ipinapaalala aniya ng mga Commander sa mga baranggay ang mga negatibong epekto kung magkakaroon ng karahasan sa halalan.
Ang AFP Peace forum ay inorganisa bilang bahagi ng paggunita ng National Peace Consciousness Month ngayong Setyembre. | ulat ni Leo Sarne
