Kasunod ng matagumpay na pagdaraos ng Barangay at Sangguniang Elections (BSKE) sa Negros Oriental, pinaghahandaan naman ngayon ng Armed Forces of the Philippines Visayas Command (AFP-VISCOM) ang special elections sa ikatlong distrito ng naturang lalawigan.
Ang special election ay para sa pagpili ng bagong kinatawan ng 3rd district ng naturang lalawigan, matapos na i-expel ng Kamara si Representative Arnulfo Teves Jr., dahil sa pag-abandona sa kanyang pwesto at indecent behavior.
Ito’y matapos na maakusahang mastermind si Teves sa likod ng pagpatay kay Negros Oriental Gov. Roel Degamo.
Batay sa Comelec Resolution 10945, isasagawa ang special election sa Disyembre 9, kung saan ang filing of certificates of Candidacy ay sa Nobyembre 6, at ang campaign period ay mula Nobyembre 9 hanggang Disyembre 7.
Sinabi ni VISCOM Commander Lieutenant General Benedict Arevalo, na magde-deploy ng karagdagang tropa ang militar kung kinakailangan para sa seguridad, at makakaasa ang publiko ng maayos at mapayapang halalan sa ikatlong distrito ng Negros Oriental. | ulat ni Leo Sarne
