Nagpaabot ng pasasalamat si Vice President Sara Duterte sa pamahalaan ng Qatar, Egypt, at Iran.
Ito ay matapos na tumulong ang nasabing mga bansa para mapalaya ang Pilipino na si Jimmy Pacheco kasama ang iba pang mga bihag ng Hamas nitong Sabado.
Ayon kay VP Sara, ang kaligtasan ng ating kababayan na si Pacheco ay tagumpay din ng Marcos Administration sa pangunguna ng Department of Foreign Affairs, lalong-lalo na ng mga kawani ng embahada ng Pilipinas sa Israel.
Kaugnay nito ay nanawagan naman ng panalangin ang Pangalawang Pangulo na sana ay makitang ligtas ang isa pang Pilipino na si Noralyn Babadilla na pinaniniwalaang dinukot din ng Hamas.
Ani VP Sara, hangad niya ang pagtatagumpay ng usaping pangkapayapaan sa pagitan ng Israel at Hamas. | ulat ni Diane Lear
