Patuloy na hinihikayat ng Quezon City local government ang mga taxpayer sa lungsod na magbayad na ng maaga ng kanilang Real Property Tax o amilyar para makakuha pa ng diskwento.
Ayon sa LGU, mananatili pa rin ang 20% discount kung ang 2024 RPT ay mababayaran nang buo hanggang December 31, 2023.
Paiiralin naman ang 10% diskwento kung ang full payment ng amilyar ay gagawin mula January 1 hanggang March 31, 2024.
Habang wala nang magiging discount kung ang pagbabayad ay gagawing hulugan o quarterly installment.
Paliwanag ng LGU, ang nalilikom na pondo mula sa Real Property Tax ay ginagamit sa pagpapalawig ng mga proyekto at programang pangkalusugan, pang-edukasyon, at iba pang social services programs ng lokal na pamahalaan para sa QCitizens.
Maaari namang magbayad ng amilyar sa City Hall, o sa mga City Treasurer’s Office (CTO) branches at satellite offices. | ulat ni Merry Ann Bastasa
