Personal na nagtungo sa BRP Sierra Madre sa Ayungin Shoal si Armed Forces of the Philippines (AFP) Chief of Staff, Gen. Romeo Brawner Jr.
Ito’y para ipaabot sa mga sundalong nakatalaga roon ang mensahe ni Pangulong Ferdinand R. Marcos Jr. para sa kanila ngayong magpa-Pasko.
Ayon kay AFP Public Affairs Office Chief, Col. Xerses Trinidad, maliban sa mensahe, bitbit din ni Brawner kasama si Western Command Chief, RAdm. Alberto Carlos ang supply para sa mga sundalo.
Doon, sinabi ni Brawner sa mga sundalo ang pagkilala ng Pangulo sa kanilang katatagan at hindi matatawarang pagganap sa tungkulin para sa bayan.
Kasunod nito, tiniyak din ng AFP chief sa mga sundalo ng BRP Sierra Madre na hindi sila pababayaan ng pamahalaan at patuloy na ipaglalaban ang karapatan gayundin ang soberanya ng bansa sa West Philippine Sea. | ulat ni Jaymark Dagala
