Inihahanda na ngayon ng Women and Children’s Protection Desk ang kasong rape laban kay Ronald Aquino Macapagal, na unang inaresto kaninang madaling araw dahil sa ilegal na pag-iingat ng armas.
Ayon kay National Capital Region Police Office (NCRPO) Regional Director Police Major General Jose Melencio Nartatez Jr., base ito sa reklamo ng asawa ng suspek na ginahasa umano ng suspek ang kanyang sariling anak.
Ang asawa ng suspek din ang nagbigay ng impormasyon sa mga pulis na naging basehan ng search warrant na ipinatupad sa bahay ng suspek sa N. Domingo St., Brgy. Balong Bato, San Juan City kaninang madaling araw.
Dito’y narekober ng mga tauhan ng San Juan City Police Station sa pangunguna ni PCol. Francis Allan Reglos ang isang katutak na armas na kinabibilangan ng mga granada, riple, shotgun, pistola, claymore mine, gun accessory, at bala. | ulat ni Leo Sarne
