Umabot na sa mahigit sa P13 milyong halaga ng humanitarian aid ang naipamahagi ng Department of Social Welfare and Development (DSWD) sa mga lokal na pamahalaan sa rehiyon ng Davao, na naaapektuhan ng ulan at pagbaha dulot ng shear line.
Ayon kay DSWD Secretary Rex Gatchalian, sinabi ni Davao Regional Director Atty. Vanessa Goc-ong, nakapagbigay na ang DSWD Field Office-11 ng 21, 203 family food packs (FFPs) sa mga probinsya ng Davao Del Norte, Davao de Oro, at Davao Oriental.
Iniulat din ni Director Goc-ong, na ang Davao Field Office ay mayroon nang nakaantabay na distribution points upang mas mapabilis pa ang pamamahagi ng ayuda para sa mga apektadong pamilya.
Gayundin, upang mas mapabilis pa ang pamamahagi ng tulong in-activate na rin ang lahat ng Provincial Quick Response Teams at Municipal Action Teams sa lahat ng apektadong lugar.
Sa kasalukuyan, may 3,664 pamilya o 11, 797 indibidwal ang tumutuloy sa may 60 evacuation centers sa Davao Region. | ulat ni Diane Lear
