Naaresto ng Philippine National Police (PNP) ang apat na suspek sa panununog kamakalawa ng isang modern jeepney sa Catanauan, Quezon.
Kinilala ni Area Police Command – Southern Luzon (APC-SL) Director Police Lt. Gen. Rhoderick Armamento ang mga arestadong suspek na sina: Ernesto Toriado Orcine, Noel Cervantes Mariano, Dominic Valerio Ramos, at Jade Francis Cabales Castro.
Ayon kay Armamento, naaresto ang apat sa follow up operation ng mga pulis sa Malunay, Quezon, kahapon; matapos na makatanggap ng impormasyon na nag check-in ang mga suspek sa isang resort sa Brgy Butanyog, sa naturang bayan.
Natagpuan sa lugar ang pulang sasakyan na ginamit ng mga suspek na getaway vehicle.
Ayon kay Armamento, away sa pagitan ng Modern Jeepney Coop at Local Transport Group ang motibo sa panununog.
Nakatakdang sampahan ng kasong Arson ngayong araw sa Office of the Provincial Prosecutor sa Catanauan ang mga suspek. | ulat ni Leo Sarne