Kinumpirma ng Armed Forces of the Philippines ang nutralisasyon ng Amir ng Dawlah Islamiyah – Maute Group na si Khadafi Mimbesa, alyas “Engineer,” ang utak sa pambobomba noong December 3, 2023 sa Mindanao State University (MSU) sa Marawi.
Ayon kay AFP Public Affairs Office Chief Col. Xerxes Trinidad, base ito sa testimonya ng isang isang high-value member ng DI-Maute Group na si alyas Khatab na sumuko kahapon (Pebrero 11) sa 2nd Mechanized Brigade ng Philippine Army.
Ayon kay Trinidad, ang testimonya ni alyas Khatab ang nagpatunay sa inisyal na impormasyon na kasama si Khadafi Mimbesa sa mga nasawi sa operasyon ng 103rd Brigade ng Philippine Army noong Enero 25 hanggang 26 sa Lanao del Sur.
Binati naman ni AFP Chief of Staff Gen. Romeo Brawner Jr. ang mga tropa ng 103rd Brigade sa pamumuno ni BGen. Yegor Rey Barroquillo Jr. sa matagumpay na operasyon laban sa mga responsable sa MSU bombing, kasabay ng panawagan sa mga nalalabing miyembro ng grupo na sumuko na. | ulat ni Leo Sarne
