Hindi sang-ayon ang PNP sa pananaw ng ilang mga tumututol sa pagpapahintulot sa mga sibilyan na mag-ari ng semi-automatic rifles, na ito ay magreresulta sa pagtaas ng krimen.
Sa pulong balitaan sa Camp Crame, sinabi ni PNP Public Information Office Chief Police Col. Jean Fajardo na inaasahan pa nga ng PNP na ito ay makakatulong sa pagpapababa ng krimen.
Ayon kay Fajardo, sa ngayon ay may mahigit 700,000 armas ang napaso ang lisensya at rehistro mula nang ipagbawal ang pag-aari ng semi-automatic firearms noong 2020, na klasipikado na ngayong bilang loose firearms.
Paliwanag ni Fajardo, sa muling pagpapahintulot ng PNP sa semi-automatic weapons, alinsunod sa orihinal na spirito ng RA 10591 o Comprehensive Firearms Regulation Act of 2013, mababawasan ang bilang ng mga loose firearms.
Kapag rehistrado aniya ang mga semi-automatic weapons, mas madali na para sa PNP na matunton kung gamitin ang mga ito sa krimen. | ulat ni Leo Sarne