Nagsumite na ng kanilang Certificate of Candidacy (COC) sa Robinsons Town Mall sa Barangay Tinajeros si Malabon City Mayor Jeannie Sandoval at ang kaniyang mga kaalyado.
Ayon kay Mayor Sandoval, muli siyang tatakbo upang ipagpatuloy ang mga nasimulang programa para sa ikabubuti ng mga residente.
Kabilang sa mga programang ito ang malawakang ayuda sa Blue Card, programang pabahay, libreng edukasyon, flood-mitigation, tulong pinansyal, at iba pang dagdag na benepisyo.
Naghain na rin ng COC si District 2 Councilor Edward Nolasco bilang bise alkalde at running mate ni Mayor Sandoval.
Kasama naman sa naghain ng COC ang asawa ni Mayor Sandoval na si Federico “Ricky” Sandoval na muling tatakbo sa pagka-kongresista ng lone district ng Malabon.
Nagsumite na rin ng COC ang mga tatakbong konsehal sa ilalim ng Team Kakampi.
Dumagsa naman dito sa mall ang mga tagasuporta ni Mayor Sandoval at kanilang mga kaalyado. | ulat ni Diane Lear
