Patuloy ang isinasagawang manhunt operation ng mga awtoridad laban sa apat na suspek na sangkot sa pagpatay kay Bulacan Provincial Board Member Ramil Capistrano at driver nitong si Shedrick Suarez sa Malolos City noong October 3.
Kabilang sa mga pinaghahanap sina alyas Jeff at alyas Lupin, kasama ang pulis na si Police Staff Sergeant Ulysses Pascual at pinsan nitong si Cesar Gallardo.
Ayon kay PNP Spokesperson Police Brig Gen. Jean Fajardo, nagpaalam umano uuwi si Pascual sandali at hindi na bumalik pa. Sinibak na ang bantay na pulis dahil sa pagpapabaya matapos na hindi na bumalik si Pascual sa CIDG.
Mahaharap si Pascual sa patong-patong na reklamo.
Hindi naman isinasantabi ng PNP na may kaugnayan sa trabaho ang pamamaril kay Capistrano.
Samantala, kinasuhan na ng double murder ang apat na sangkot sa pagpatay kay Capistrano. | ulat ni Diane Lear
