Hawak na ngayon ng Philippine National Police-Supervisory Office for Security and Investigation Agencies (PNP-SOSIA) ang isang security officer matapos maaresto dahil sa pamemeke ng lisensya.
Kinilala ni PNP CSG Director, Police Brigadier General Benjamin Silo Jr. ang suspek na si June Reyes Geminiano.
Nahuli sa akto si Geminiano na nag-deliver ng pekeng License to Exercise Security Profession (LESP) sa kaniyang aplikante sa Brgy. Bagong Lipunan sa Quezon City.
Ang License to Exercise Security Profession ay ang permit na ibinibigay sa isang security o training officer.
Nakuha mula kay Geminiano ang isang security officer LESP at isang security guard LESP.
Batay sa inihaing reklamo, si Geminiano ang itinuturong nagpoproseso ng LESP na nalamang peke base sa record ng Security Licensing Division. | ulat ni Jaymark Dagala
