Nag-alok ng P100,000 pabuya ang Citizen Crime Watch (CCW) para sa sinumang makapagtuturo sa mga salarin na pumatay sa dalawa nilang miyembro, sa Antipolo City kamakailan.
Ayon kay Diego Magpantay,CCW National President, nais nilang mapabilis ang paglutas sa kaso at mabigyan ng hustisya ang pagpatay kina James Torres Anselmo, Chairman ng CCW at Benjamin Natividad.
Pasado alas-12 ng tanghali noong May 16, nang tambangan ang mga biktima sa Barangay Cupang, Antipolo City habang magkaangkas sa motorsiklo.
Basta na lamang silang pinagbabaril ng dalawang di kilalang lalaki na bigla na lang sumulpot sa lugar.
Kapwa nagtamo ng mga tama ng bala sa iba’t ibang bahagi ng kanilang katawan ang dalawa na agad nilang ikinamatay.
Sinisilip ngayon ng Antipolo City Police, ang anggulong may kinalaman sa awayan sa lupa ang posibleng motibo sa krimen. | ulat ni Rey Ferrer
