Nagpatupad ng rigudon ang pamunuan ng Philippine National Police (PNP) sa 8 nilang opisyal epektibo ngayong araw, Hunyo 26.
Kabilang sa mga napabilang sa balasahan sina National Capital Region Police Office (NCRPO) Director, P/MGen. Edgar Alan Okubo na ililipat sa Directorate for Police Community Relations (DPCR).
Papalitan si Okubo ni P/BGen. Jose Melencio Nartatez na nagmula naman sa Directorate for Intelligence (DI), ang posisyong unang binakante ng ngayo’y PNP Chief, P/Gen. Bejamin Acorda Jr.
Papalit kay Nartatez sa Directorate for Intelligence o DI si P/MGen. Jon Arnaldo na nagmula sa Directorate for Human Resouce and Doctrine Development (DHRDD).
Ang Deputy Director ng Directorate for Intelligence na si P/BGen. Ronald Lee ay siyang papalit naman kay Arnaldo sa DHRDD.
Habang magpapalitan naman ng posisyon sina P/MGen. Eric Noble na Director ng Philippine National Police Academy (PNPA) at P/BGen. Samuel Nacion na siyang pinuno ng Directorate for Investigation and Detective Management (DIDM).
Ang papalitan naman ni Okubo na si P/MGen. Mario Reyes sa DPCR ay ililipat naman sa Directoriate for Logistics (DL).
Habang si P/BGen. Alan Nazarro ng Directorate for Informations and Communications Technology Management (DICTM) ay ililipat bilang bagong pinuno ng PNP Highway Patrol Group (HPG).| ulat ni Jaymark Dagala
