Kapwa lumagda ng sisterhood agreement ang Pamahalaang Lungsod ng San Juan gayundin ang bayan ng Magdiwang sa Romblon ngayong araw.
Ito’y sa kaalinsabay ng pagdiriwang ng ika-160 kaarawan ni Gat. Andres Bonifacio ngayong araw.
Pinangunahan nila San Juan City Mayor Francis Zamora at Magdiwang Mayor Arthur Rey Tansiongco ang paglalagda sa kasunduan sa San Juan City Hall Atrium matapos ang maikling programa.
Ayon kay Mayor Zamora, mahalaga ang kasunduan sa pagitan ng dalawang LGU dahil dito ay magpapalitan sila ng mga best practice partikular na sa larangan ng turismo, sining at kultura, social services, public health at pangangalaga sa kalikasan.
Napapanahon ani Zamora ang sisterhood agreement signing sa bayan ng Magdiwang dahil ito ang ginamit na pangalan ni Bonifacio sa kanilang partido noong panahong itatag ang unang republika katapat ng Magdalo na pinangunahan naman ni Heneral Emilio Aguinaldo. | ulat ni Jaymark Dagala
