Pinuri ni Armed Forces of the Philippines Visayas Command (AFP-VISCOM) Commander Lt. General Benedict Arevalo ang mga tropa ng 47th Infantry Battalion at PNP sa nutralisasyon ng top NPA leader sa Bohol kaninang umaga.
Si Domingo Jaspe Compoc aka Silong, ang Secretary ng nabuwag na Bohol Party Committee, ay kabilang sa limang terorista na nasawi sa Joint Enhanced Military Police Operation (JEMPO) ng 47IB at Bohol Police Provincial Office (BPPO) sa Brgy Campagao, Bilar, Bohol kaninang 6:52 ng umaga.
Sa naturang operasyon, narekober din ng mga tropa ang 6 na armas ng kalaban kabilang ang isang M653 assault rifle; isang R4 assault rifle; isang M16 rifle; at 3 Cal. .45 pistols.
Ayon kay Lt. Gen. Arevalo, ang matagumpay na operasyon ay nagsisilbing mensahe sa mga nagtatagong teroristang komunista na hindi titigil ang militar hangga’t hindi nakakamit ang hustisya para sa kanilang mga atrosidad laban sa mga mamayan.
Ang notoryus na lider-komunistang si Domingo Compoc ay may patong sa ulong 2.6 milyong piso, at wanted sa isang katutak na kaso, kabilang ang rebellion, homicide, attempted homicide, multiple murder, frustrated murder, at robbery. | ulat ni Leo Sarne
